Hvar ætlar þú að vera ?

Nú fer að halla að jólum og um að gera að fara að huga að þeim í tíma.

Ekkert er eins dýrt og að geyma það um of. Maður kaupir oft  meira og dýrari hluti ef tíminn er að verður of naumur. Það er allavega mín reynsla. Mér finnst voða gott að byrja bara smátt og smátt á undirbúningnum, bæta við daglega einhverju “ jóla” og njóta þess að vera í þessari jólastemmingu.

Eins og allir vita þá byrja jólin í IKEA og þessvegna  fór ég þangað með elskulegri dóttir minni og hjartaprinsinum mínum. Síðan bættist hin dóttirin við með eldri son sinn sem bæði eru alger yndi, alltaf, á öllum sviðum. Að endingu bættist svo annar tengdasonurinn í hópinn, óvenju elskulegur. J 

 Það var mjög gaman að leyfa litla kútnum að labba með stuðning af vísifingrum ömmu sinnar um stóra sali verslunarinnar í Hafnarfirði. Hann var alveg heillaður af öllu sem fyrir augu bar. Ekki spurning ... (þó hann segði það ekki beint) sjá mynd.

  Ég keypti mér eina hvíta seríu sem ég hengdi strax í gluggann í eldhúsinu þegar ég kom heim þannig að nú er komin jólabirta þar um kvöld og nætur.Eitt er þó fyrirkvíðanlegt um hver jól en það er spurningin  “ hvar ætlar þú að vera á jólunum? “

 Þessi spurning er að gera mig brjálaða ár eftir ár. Það er eins og þessar sex klukkustundir á aðfangadagskvöld séu jólin.  Eins og það skipti mestu máli með hverjum þú ert það kvöld.  Það er eins og það séu drottinssvik eða glæpur að vera einn með sjálfum sér á þessu blessaða aðfangadagskvöldi.. Margir fara í kirkju þetta kvöld, ég þar á meðal, en ég hef það á tilfinningunni að það sé hjá mörgum til að húsmóðirin fái frið til að búa út hátíðarkvöldverðinn.Hvað mig varðar þá er þetta bara vani því ekki eru prestarnir að heilla mig eða söngurinn (alltaf sama predikun,sömu sálmar,sömu messusvör.) Ég vil hafa þetta allt öðruvísi. Ég vil að fjölskyldan sé meira saman að dunda sér á jólaföstunni og pæli í fallegum hlutum, rómantískri birtu, fallegri tónlist og ljósadýrð sem færir manni frið í hjartað og gleði í sinnið. Ekkert færir manni meiri gleði en koss eða faðmlag frá þeim sem maður elskar og því er upplagt að leggja meira í þá hluti þennan dimmast og kaldasta  mánuð ársins. Síðan er það bara hvers og eins hvar hann er og með hverjum á fæðingarstund frelsarans....eða þannig.

 

Íslenskan.

 Ég hef verið að velta því fyrir mér hvað þurfi að gera til að fá útlendinga til að læra íslensku. Ég starfaði sem forstöðumaður fræðslusjóðs fyrir ófaglært verkafólk í rúmt ár og það kom varla fyrir þegar að erlenda verkafólkið, sem var búið að sitja 50 tíma námskeið í íslensku, kom til að innheimta styrkinn sinn, að það treysti sér til að tjá sig við mig á ástkæra ylhýra málinu. Hvorki heilsa né kveðja eða þakka fyrir sig. Þó var það elskulegt og þakklátt. Mér fannst því fé sem fór í þetta nám illa varið, satt best að segja og tel að svo sé enn í dag. Ég spyr mig að því hversvegna þurfi að fara í gegnum menntakerfið með þessa kennslu. Ef ég t.d. flytti tímabundið til Svíþjóðar, sem mig langar til að gera, myndi ég endilega vilja læra sænsku og helst af þeim sem ég umgengist í vinnunni eða vinum sem ég eignaðist eða fólki sem ég þekkti. Ég get alveg séð það fyrir mér að fólk sem kemur til landsins og vill læra íslensku, geti bara tilnefnt sinn trúnaðarmann sem muni sjá um að kenna því og svo fær sá aðili greitt fyrir það þegar útlendingurinn er orðinn það góður í málinu að hann getur farið í stöðupróf. Það mætti setja á þetta tímamörk t.d. eitt ár. Þetta gæti skapað góðan vinskap á milli Íslendingsins og innflytjandans. Þetta stuðlar líklega að því að Íslendingar fara að líta á sitt tungumál öðrum augum og meta það meira. Í dag greiðir ríkið cirka 50 þúsund vegna þessara námskeiða til þeirra sem halda þau. Ég er viss um að einhverjir eru til í að taka að sér að kenna viðkomandi mun meira í málinu en þeir læra á umræddum námskeiðum. Síðar getur innflytjandinn ef hann vill farið í nám í íslensku og haft mikið gagn af því þegar hann er farinn að skilja og tala málið. Þá getur hann nýtt þann rétt sem hann á hjá stéttarfélagi sínu sem í umræddum sjóði fyrnist eftir árið nema í einstaka tilfellum. Þessi aðferð myndi líka vinna gegn einangrun og slá á völd þeirra útlendinga sem hafa lært málið og eru á stundum dóminerandi í grúppum sem innflytjendur mynda gjarnan og eru ekki æskilegar að mínu áliti.

Hvers virði er mannorðið?

 Ég var að lesa grein þar sem Kristján L. Möller tilkynnir að hann hafi beðið Einar Hermannsson, ráðgjafa Vegagerðarinnar í Grímseyjarferjumálinu, afsökunar á að hafa ranglega ásakað hann um að bera ábyrgð á óráðsíu ríkisstjórnarinnar í því máli. Ég tel að ráðherrann hafi skaðað orðstýr þessa fagmanns og atvinnumöguleika verulega og mér finnst afsökunarbeiðnin ómerk þar sem hann stendur enn á því að hann vilji ekki njóta starfskrafta ráðgjafans. Nú á að fá nýja ráðgjafa og eitthvað kostar það, því þeir þurfa væntanlega að kynna sér hvað gert hefur verið og setja sig inn í málið á síðasta framkvæmdaþrepi þess. Ég spyr mig hvort Möllerinn, með því að ásaka skipaverkfræðinginn,  hafi verið að verja forvera sinn þegar hann var komin í stjórnarsamstarf við Sjálfstæðisflokkinn? Eitthvað breyttist tónninn í honum þegar Sturla Böðvarsson lýsti því sjálfur yfir að hann bæri auðvitað ábyrgð á því sem gerðist í hans ráðuneyti........ Æ sorry Einar og málið dautt ? Ég held að ráðherrann megi þakka fyrir ef hann fær ekki málsókn á hendur sér eftir að hafa veist persónulega að einstaklingi sem að því er mér skilst, hafi bent á kosti og galla skipsins og ekki haft neitt  ákvörðunarvald um breytingar á þessu blessaða fleygi að segja. Hvað með starfsmenn ráðuneyta og stofnana ríkisins sem unnu að málinu. Hafa þeirra nöfn verið birt ? Hefur þeirra vinnuframlag verið afþakkað? Það er alvarlegt mál að fara illa með almannafé en ég hygg að það hafi verið ætlun manna að vanda þá samgönguleið sem þessi ferja á að vera Grímseyingum og viljað þeim allt það besta. Að hengja bakara fyrir smið er þó sýnu verra því það verður ekki bætt með fé. Ég held að skriðþungi ráðherrans KLM hafi komið honum í koll í þessu máli þó hann noti þetta aukaklúður í málinu til að mýkja ímynd sína með afsökunarbeiðni.Um eitt er ég þó sammála KLM og það er að allir ættu að eiga þess kost að heimsækja Grímsey. Það er mjög yndilegt og sérstakt að koma þangað.

Ekki versla yfir þig

 Elsku hjartans stelpan mín. Hvað ert  þú að pæla núna? Þú sem ert nýbúin að setja saman heimili með yndislegum manni og eignast krúttlegasta kríli í heimi. Nú ertu búin að setja íbúðina á sölu sem var skveruð fyrir nokkrum mánuðum til að kaupa aðra stærri. Veist þú ekki hvað er að gerast í lánamálum á Íslandi?Vilt þú verða þræll bankans næstu 40 árin? Viltu að bankinn fái helminginn af laununum þínum?Veistu að ef námsmennirnir renna á auglýsingar bankanna og versla út í eitt til að fá aukakrónur (aulakrónur)  hækkar lánið þitt.Veistu ekki að ef sægreifarnir selja kvótaeignina sem þjóðin hefur gefið þeim og eyða peningunum  á Íslandi hækkar lánið þitt.Þetta er útaf neysluvísitölunni sem hækkar lánin  eftir neyslu og kaupæði landans. Ef bankarnir halda áfram að lána til nýbygginga þar til  markaðurinn  mettast  endar það með því að markaðsverð á húsnæði lækkar vegna offramboðs og lánið verður hærra en íbúðarverðið.Þú þarft þá að sitja uppi með lán sem eignin stendur ekki fyrir þegar og ef  þú selur íbúðina eða bankinn hirðir hana af þér. Hugsaðu þig nú vel um krúttið mitt. Þetta er líka spurning um frelsi. Þetta sama á við um þig lesandi góður. 

Hvunndagsergelsi

Í dag hitti ég skemmtilegan iðnaðarmann. Hann talaði góða íslensku enda Íslendingur. Hann kom heim til mín til að gera við ísskápinn sem orðin er átta ára og því vafi hvort borgaði sig að gera við hann. Hann sagði mér að koma ( heim úr vinnunni) með 15 þúsund krónur því hann vissi hvað væri að þ.e. hitaelementið. Auðvita gerði ég þetta og hugðist nýta tímann og strauja á meðan ég þyrfti að hanga heima yfir iðnaðarmanni. Hann var hinsvegar í spjallstuði og spurði mikið þannig að ég kom mér ekki að verki. Þegar hann setti ísskápinn í samband vildi ekki betur til en svo að strau-vélin sló út rafmagninu. Ég sagði honum að hann hefði gert einhverja vitleysu og þetta væri örugglega honum að kenna. Hann bara hló að mér. Þegar hann fór hélt hann á hitaelementinu úr strau-vélinni  undir hendinni. J  Það er eins og öll tækin mín séu að gefast upp öll á sama tíma. Spurning hvort hitaelementið í mér þolir þetta. JJ

Aukakrónur og aurar...

Það er svolítið skemmtilegt að fylgjast með markaðsmálum í bankanum sínum þegar maður er sjálfur kominn aðeins frá  þeirri firringu sem þar ríkir. Ég sá að nú eru þeir farnir að auglýsa aukakrónur sem koma bara......Einu sinnu var slagorðið “Græddur er geymdur eyrir “ og var það notað löngu eftir að verðbólgan gleypti nánast alla aura sem lagðir voru inn í bankann. Á tímabili tókum við upp slagorð útibússtjórarnir okkar á milli sem var  “Greidd skuld –glatað fé” en það var á árunum þegar fólk borgaði helst ekki skuldir sínar heldur varð gjaldþrota og byrjaði svo upp á nýtt með nýtt fyrirtæki á nýrri kennitölu. Seinna voru þeir með bleika miða út um alla geimstöðina  sem ég held að hafi átt að vera bankinn. Ég náði aldrei upp í þá auglýsingu og nú er komið nýtt slagorð sem blasir við hvert sem litið er. Aukakrónur sem koma bara og hópur af fólki sem hleypur á þessa vitleysu eins og sýnt er í auglýsingunni.Í gamla daga var áherslan lögð á að fólk sparaði fé og legði það inn í bankann en núna snýst þetta um að fólk eyði sem mestu og helst hjá fyrirtækjum sem eru í “samstarfi”. Þar fær fólk ennþá fleiri krónur.. hahahaha . Sem sagt auka neysluna og hækka neysluvísitöluna og þar með lánin sem þeir eiga en viðskiptavinirnir borga....hahaha  alltaf græðir bankinn meira og meira...gaman að eiga hlutabréf núna. J Hver ætli eigi samstarfsfyrirtækin? Hversvegna gefað þeir bara ekki eftir seðilgjald á greiðsluseðlum hjá þeim sem skulda og geta ekki afþakkað seðil þó þeir greiði í  einkabankanum.? 

Lífið er undarlegt.

  

Skrýtið hvað lífið er skrýtið.

Ég verð ennþá , svona gömul sem ég er, fyrir vonbrigðum þegar hlutirnir ganga ekki upp hjá mér.

Ég hélt að þetta yrði góð helgi og var búin að sjá fyrir mér að ég myndi spila mikið golf og þá á golfvöllum sem ég hef ekki spilað áður. Ekki þarf að kvarta yfir veðrinu sem er yndislegt en þegar maður er pæla í öðru fólki þá getur alltaf eitthvað komið uppá sem gerir það að verkum að maður situr bara heima og gónir á sjónvarpið eins og alla hina dagana. Ég skrapp þó níu holur á Korpunni í dag, laugardag, en hún er nú bara alveg að verða góð aftur eftir erfiðleika með grínin í sumar. Ég prófaði nokkra drivera sem ég hef að láni frá Nevada Bob. Var alveg ánægð með mig en ekki að falla fyrir nýjum græjum að þessu sinni.

Hvort ætli Sjálfstæðismenn vilji selja Rúv eða ekki. :)

Að loknum kosningum.

 Það var spennandi að fylgjast með kosningasjónvarpinu og sérstök upplifun að vera inni alla nóttina og detta svo út í morgunsárið. Ég er samt þokkalega ánægð með gengi flokksins í mínu kjördæmi þegar litið er til þess að ég er óþekkt nafn og ekki búin að vera lengi í Frjálslynda flokknum.Þetta var þungur róður vegna þess rekin var heiftarlegur áróður gegn okkur af andstæðingum flokksins bæði gegn stefnu okkar í innflytjendamálum og gegn ýmsum einstaklingum. Það var líka eins og menn væru lengi að sjá í gegnum leikfléttu Margrétar Sverrisdóttur á flokksþinginu stuttu fyrir kosningar. Ég er stolt af sterku fylgi Guðjóns Arnars í sínu kjördæmi og var þess fullviss allan tímann að þar fór sterkur listi, enda sýndi það sig á lokasprettinum. Ég er þakklát fyrir hlýtt viðmót fólks, bæði flokksbundnu í Frjálslynda flokknum og eins þeim sem við vorum að keppa við. Ég hef upplifað gott viðmót hjá öðrum frambjóðendum annarra flokka sérstaklega  vinstri grænum og er ekki kát yfir að Guðfríður Lilja sú litríka persóna og skáksnillingur hafi ekki náð inn á þing.  Mitt fólk hefur unnið vel og á heiður skilið fyrir það og mínar bestu þakkir. Við munum stilla saman strengina á næstu dögum og halda áfram að berjast fyrir þeim málstað sem við erum sannfærð um að sé sá besti fyrir þjóðina í heild.Ég held að þó þeir félagar Magnús Þór og Sigurjón Þórðar hafi ekki náð inn á þing þá séu þeir ekki hættir að láta til sín taka á hinum póitíska vettvangi. En að lokum þá verð ég að viðurkenna að það er léttir að þetta er búið í bili og maður getur farið að huga að sjálfum sér og  litlu krúttunum sínum.

Viðtal á Rás 2

 

Frjálslyndi flokkurinn vill að vaxtaokri verði aflétt af heimilunum í landinu.

Ég starfaði sem útibússtjóri Landsbankans í 25 ár víða um land og hef mikla reynslu úr viðskiptalífinu. Um langt árabil hef ég sem útibússtjóri banka reynt að finna leiðir til að hjálpa fólki að halda fjármálum sínum á réttum kili. Það hefur ekki verið auðvelt fyrir alla að fóta sig í því fjármálaumhverfi sem við búum við. Þótt flestir geti fengið lán og keypt sér íbúð þá reynist sumum erfitt að halda lánum í skilum þegar verðbólgan fer á fulla ferð. Verðbólgumarkmið Seðlabankans hefur verið 2.5 % á ársgrundvelli. Í dag er verðbólgan yfir 7 %. Þetta þýðir að verðbólgustigið hefur hækkað lánin sem þessu nemur, umfram það sem áætlað var þegar íbúðin var keypt og lánið tekið.

dæmi

Víst er að venjulegt launafólk losnar aldrei við sín lán meðan þensla og verðbólga heldur áfram að vaxa og hækkar lánin, sama hvernig borgað er af þeim. Fáir geta gert eins og sýnt er í auglýsingum sparisjóðanna þessa dagana þ,e, gefið þjónustufulltrúanum sínum langt nef, staðið upp og farið. Getur þú það áheyrandi góður?

Athugaðu málin skoðaðu hvaða kosti þú átt.

Skuldir íslenskra heimila verða að lækka.

Frjálslyndi flokkurinn leggur áherslu á að bæta aðgengi að framhaldsnámi og símenntun með aukinni áherslu á fjarnam.

Ég var forstöðumaður Starfsafls sem er fræðslusjóðs Samtaka atvinnulífsins og Flóabandalagsins og þekki vel fræðslumál ófaglærðs verkafólks. Í því starfi varð mér ljóst hversu mikilvægt er að fólk bæti við sig þekkingu þó þar sé ekki um hefðbundið nám að ræða þá er öll þekking lykill að farsælum árangir í lífi og starfi.

Það gerir fólki kleyft að endurnýja og aðlaga þekkingu sína að nýjum aðstæðum, flytja sig milli starfa og skapa ný störf.

 

Frjálslyndi flokkurinn leggur mikla áherslu á að tryggja fötluðum fullan aðgang að þjónustu, vinnu og menntun.

Ég er framkvæmdastjóri Sjálfsbjargar Landssambands fatlaðra og hef mikinn áhuga á þeirra málefnum. Þar vil ég sjá miklar breytingar.

Við í Frjálslynda flokknum ætlum að berjast fyrir því að skattleysismörk hækki í 150 þús á mánuði og að öryrkjar og aldraðir geti unnið fyrir 1. milljón króna á ári, án þess að bæturnar skerðist. Einnig verður tekjutenging maka afnumin strax.

Skatttaka á laun sem varla nægja til framfærslu er óhæfa og hefur sett fólk í fjötra fátæktar sem erfitt er að komast út úr. Það er takmarkað hvað fólk þolir af álagi á líkama og sál og þar kemur að fólk bognar undan því. Líklegt er að mikið vinnuálag valdi fjölgun öryrkja sem er staðreynd

Þessu þarf að breyta og það viljum við gera í Frjálslynda flokknum.

Frjálslyndi flokkurinn er lykillinn að breytingum í vor.

X F er fyrir þig.

Setjum ekki hagfræðimælistiku á mannlífið.

Mikið hefur verið rætt um vegamál og vegagerð á undanförnum árum . Við hjá Frjálslynda flokknum viljum beita okkur fyrir því að meira fé verði lagt í vegagerð því við viljum sjá landið allt í byggð. Forsenda fyrir því að svo verði er að vegamál og samgöngumál séu í sem allra bestu lagi svo að þjónusta við landsbyggðina fari fram á sem bestan máta.Auðvitað veit ég að til þess að fólk vilji og geti búið úti á landi er nauðsynlegt að þar sé næg atvinna og góðir tekjumöguleikar án þess að fólk sé að vinna myrkranna á milli.

Stefna okkar í sjávarútvegsmálum er þungt lóð á vogarskálarnar þegar horft er til landsbyggðamála.

Mér finnst ég hafa orðið vör við það að undanförnu að ungt fólk hefur sýnt því áhuga að flyta burt úr hraða og mengun stórborgarinnar. Það finnst mér góð þróun og vona að okkur takist að halda landinu öllu í byggð því það er það sem gerir okkur að sterkri þjóð í stóru og fallegu landi.Ungt og duglegt fólk sem er að koma sér upp heimili og fjölskyldu ætti að eiga þess kost að flytja á landsbyggðina  þar sem allt mannlíf er persónulegra og litríkara að mörgu leyti og auðveldara að ala upp börn.

Að sama skapi ætti fólki sem búið hefur um lengri tíma á landsbyggðinni og vill flytja þaðan að gefast kostur á því að losna við fasteignir sinar fyrir viðunandi verð. Við vitum að mörg sveitarfélög eru ekki í stakk  búin til að veita alla þá þjónustu sem þeim ber t.d. í öldrunarmálum eða málefnum fatlaða. Oft er það þannig að aldraðir þyrftu að flytja sig um set er líður á ævina og sækja suður á bóginn þar sem betri þjónusta er í boði en eru bundnir í átthagafjötra vegna húsa sinna.

Ég minnist þess að  hafa lesið pistil eftir bæjarsjóra í Bolungavík fyrr í vetur og við lesturinn langaði mig að flytja þangað. Það er nú kannski ekki spennandi fyrir einhleypa ömmu að flytja út á land en þarna var lýst  því andrúmslofti sem ég þekkti svo vel sem ung kona á Raufarhöfn og seinna á Hellissandi  þegar ég var að ala upp mínar yndislegu dætur. Að búa úti á landi er eitthvað sem mér finnst að sem flestir eigi að kynnast . Ég vil sjá kröftuga uppbyggingu með ungu fólki á landsbyggðinni með fleiri valkostum en þegar ég var að flytja þaðan fyrir 10 árum síðan. Eldra fólkið getur svo verið í Reykjavík innan um listamenn og yfirstressað fólk sem þráir friðsæld fjallanna og fuglasönginn sem íbúar minni byggða á landsbyggðinni njóta allt árið um kring.Hvers virði væri allt þetta land ef við værum öll komin á Stór – Reykjavíkursvæðið.Ég er ekki að sjá þá landssýn fyrir mér.Ýmsar leiðir eru til að hvetja fólk til að helga landsbyggðinni krafta sína t.d. skattahlutfall eða skattaafsláttur (eins og í Noregi) en meira um það síðar. Höldum öllu landinu í byggð. Ef þú ert sama sinnis og ég ...kjóstu þá X-F í kosningum í vor.