Gleðilegt sumar

Nú er sumarið komið samkvæmt hefðbundinni dagskrá almanaksins. Þó enn sé frekar grátt um að litast hér suðvestanlands og allt í ösku og leir sunnan til á landinu þá er sálin að taka við sér og ekki laust við að fiðringur fari um brjóstið. Víst eru plöntur aðeins að taka við sér og svo vorboðinn óvefengjanlegi, hreinsunardeild Kópavogsbæjar, farin að minna á sig. Það kallar á vorverk í garðinum og undirbúning ýmiskonar. Ef guð lofar mun ég fá handrið á tröppurnar sem búin eru að vera í smíðum hjá ákveðnu fyrirtæki og áttu að vera til afhendingar fyrir mörgum vikum síðan. Þegar það er komið verður hægt að hefja málningarvinnu utanhúss. Það fer óskaplega í mig að geta ekki klárað verk sem ég er byrjuð á. Golfið er líka um það bil að byrja og er reiknað með að minn heimavöllur opni 8. maí samkvæmt síðustu fréttum. Ég mun nýta mér það strax og vera dugleg að spila í allt sumar. Ný markmið varðandi forgjöfina í smíðum og miklar væntingar. 

Óska öllum gleðilegs sumars og góðs árangurs í markmiðum sínum.

Fallnar forystukonur

Á síðustu helgi var kastljósinu beint að kvenskörungum í íslenskri pólitík. Konur sem horft hefur verið til sem mikilla forystukvenna hafa nú þurft að yfirgefa vettvang stjórnmála til lengri eða skemmri tíma.

Samviskan marga þung nú þjakar,

þingmenn hverfa einn og einn.

Öldur flæða víst aldrei stakar,

var enginn hérna hreinn og beinn?   (TH)

Það var ömurlegt að horfa á járnfrú Samfylkingarinnar niðurbrotna yfir gerræðislegum vinnubrögðum sínum þann stutta tíma sem hún sat við völd á þjóðþingi Íslendinga. Þessi kona sem hefur verið fyrirmynd íslenskra kvenna í áraraðir og var þvílíkur töffari að hún skákaði bresku járnfrúnni sem virkaði mjúk og mild í samanburðinum. Nú grét hún í hálsakot síns hógværa eiginmanns. Nú þurfti hún fyrirgefningu og skilning. Nú var hún ekki lík Davíð. Hún brást sjálfri sér, flokknum, kjósendum og þjóðinni. Hún brást einnig sem fyrirmynd. Þetta er erfitt að sætta sig við og fyrirgefa.

Framganga hennar við samráðherra sinn og ráðherra bankamála verður lengi í minnum höfð sem og hennar eigið getuleysi til að taka ákvörðun á móti peningamönnum og yfirborguðum ráðgjöfum bankanna.

Varaformaður Sjálfstæðisflokksins var ekki eins hágrátandi og virtist ekki eins sannfærð um sína sekt og félagar hennar í flokknum og mest öll þjóðin. Kannski er það afneitun, kannski ekki. Hún sló um sig  með hástendum ofurvæmnum yfirlýsingum um elskuverðan eiginmann sinn, sem skilja mátti sem svo að hafi brugðist í dómgreind fyrir þau bæði. Hún var ekki það ærleg að hætta alveg á þingi og borgar því lágmarksgjald fyrir sinn þátt í blekkingaleiknum við almenning sem meðal annars birtist í hrokafullri framkomu við erlendan bankasérfræðing sem hingað kom og varaði mjög við ógnvænlegri stöðu bankanna, mörgum mánuðum fyrir hrun.

Ég vona að íslenskar konur í pólitík verði sjálfstæðar og óháðar í framtíðinni og axli sínar ákvarðanir af ábyrgð og heiðarleika á réttum stað á réttum tíma.   

Ertu down Gordon Brown

                                                           Nýtt öskuský til Bretlands

Það er óhætt að fullyrða að það eru ekki margir Bretar sem ekki hafa heyrt um Ísland getið og auðvelt að giska á hver þeirra hugur er um þessar mundir.

Askan svört nú álfu skekur

í Englandi er allt í steik

Grimma reiði gosið vekur

Gordon Brown á næsta leik

Jafntefli

Rosalega var ég hamingjusöm með jafntefli við Frakkana. Það er unun að horfa á franska liðið spila enda besta lið í heimi. Strákarnir okkar gáfust ekki upp og fóru með sóma frá þessum leik. Réttast væri að "aska" Frakkana í smá tíma og spila við þá þar til þeir fara að venjast því að tapa fyrir okkar liði. Ég hlakka til að sjá leikinn á morgun og svo verður spennandi að sjá hvort Man. City tekur ekki United í bakaríið á morgun. 

Ný nálgun

Afar fróðlegt var að fylgjast með Silfri Egils síðasta laugardag og heyra Hönnu Birnu fara með gömlu rulluna sem ég og við sem stóðum að óháðu framboði heima á Raufarhöfn  í sveitarstjórnarkosningunum 1982 og aftur 1986 fórum með á þeim tíma. Á Raufarhöfn, þar sem allir þekktu alla, fannst okkur unga fólkinu ekki ástæða til að vera að mynda meirihluta og minnihluta. Fyrir okkar litla samfélag töldum við best að allir ynnu saman. Þetta þótti alveg óframkvæmanlegt á þeim tíma. Þetta er það sama og Hanna Birna borgarstjóri er að tala um núna. Ég verð að taka ofan fyrir henni og segja að mér finnst hún afar skynsöm í þessum málflutningi. Hún hraunaði alveg yfir aðra frambjóðendur og hafði alveg augljóslega gaman af framboði Besta flokksins. Einhvern vegin fannst mér hún hafa minna gaman af oddamanni heiðarlega framboðsins enda búin að vinna með þeim manni allt of lengi. Borgin þarf nú, sem aldrei fyrr, á heilsteyptum og heilbrigðum borgarstjóra að halda. Hanna Birna kann til verka þegar kemur að fjölmiðlaframkomu og kosningabaráttu. Hún skar sig úr hópnum bæði í leikrænum tilburðum, klæðaburði og klókum málflutningi. Hún var tilgerðarlaus og trúverðug. Ekki er heldur á allra færi að hleypa brúnum eins og hún gerir.