Mök um miðjan dag

Margt er nú mannanna bölið og tekur það á sig ýmsar myndir. Ég sem þykist vera mikil friðarins manneskja hef átt í mesta basli með sambúðarslit. Þessa dagana er það blóðugur slagur við fyrri sambýlinga sem ég hélt að ég væri búin að slíta öll tengsl við. sjá hér.  Ég hef verið afar íllskeytt í sumar við þessar dúllur og "kústað" þær niður,sprayað flugnaeitri á þakskeggið af og til en ekkert dugði. Um miðja síðustu viku kom til landsins fólk sem ég er að vinna með í Evrópuverkefni og ég ákvað að  bjóða því heim eitthvert kvöldið. Eftir að hafa tekið extra vel til innanhúss fór ég í að slíta niður vefina utan á húsinu og náði þá einni af stærri gerðinni. Næsta kvöld þegar ég kom heim voru komnar tvær stórar í sitthvort hornið og ófu sem aldrei fyrr. Ég sótti kóngulóarkústinn og náði að drepa þær báðar, sprayaði og sópaði stétt og tröppur auk þess svæðis sem þær hafa tileinkað sér. Þá kom í ljós að ljósleitur hnoðri sem ég hélt að væri birgðaforði þeirra reyndist vera öðruvísi könguló, stór með ljósgrænt bak. Sennilega móðir með fullan poka af litlum köngulóabörnum. Það var erfitt að drepa hana en ég lét mig hafa það. Nú var ég í nokkuð góðri trú um að ég gæti skammlaust boðið erlendu gestunum heim. Partýdagurinn rann upp og ég skrapp heim með veitingar um hádegisbilið. Nú voru hornin á þakskegginu hrein og hvorki köngulær né vefur kominn þar en sem ég geng inn í húsið sé ég að tvær stórar breddur eru í innilegum atlotum í dyragættinni, næstum í andlitshæð. Alger hryllingur. Það var nú frekar erfitt að leggjast í víking undir þessum aðstæðum en þar sem ég var í mikilli tímapressu gat ég ekki beðið eftir leikslokum og þessi samverustund þeirra varð þeirra síðasta. Þetta fer nú að verða komið gott eins og sagt er. 

Athugasemdir

[Guðrún María Óskarsdóttir., 15.7.2009 kl. 02:23]

Þú segir ekki eitt orð um tilraunir stjórnvalda til þess að troða Íslandi inn í Evrópusambandið sé ég, hver er skoðun þíns flokks á því máli ?

kv.Guðrún María.

[Kolbrún Stefánsdóttir, 15.7.2009 kl. 17:41]

Sæll Tryggvi. Já ég reikna með að allt hafi sínar slæmu og góðu hliðar, líka ég. Ég hef ekki heyrt að það valdi óhamingju að drepa kóngulær en járnsmiði hinsvegar. Það hefur verið sagt að þar sem kóngulær setjist að sé gott að búa. Það passar við mitt hús og minn stað Kópavog, þar er gott að búa. Takk fyrir innlitið kveðja Kolla.

[Kolbrún Stefánsdóttir, 15.7.2009 kl. 17:56]

Sæl GMaría. Takk fyrir fyrirspurnina. Ég hélt að allir vissu skoðun Frjálslynda flokksins á aðildarviðræðum og öllu sem viðkemur skerðingu á fullveldi þjóðarinnar. Ég hélt að ég hefði talað skýrt fyrir kosningar en það gerði nú Steingrímur J. líka og nú er hann fastur í vef Samfylkingarinnar. Það er auðvitað með eindæmum hvernig vinnubrögð eru á þinginu og hótanir Samfylkingarinnar um stjórnarslit ef VG fylgi þeim ekki. Kannski eru leyniskjöl á ferðinni sem maður veit ekki um sem gera það að verkum að við getum ekkert annað og þetta sé allt blekkingarleikur, hvað veit maður um það. Mér finnst þessi umræða óþörf vegna þess að það er ekki eftir neinu að sækjast umfram það sem við höfum nú þegar í gegnum EES. Við eigum ekki að borga Icesave-samninginn eins og hann er núna og ekki án rannsóknar á réttarstöðu okkar. En þjóðin hefur kosið þetta yfir sig og hlýtur að sitja uppi með það. Það er nú sá súri biti sem fylgir lýðræðislegum kosningum. Því er ég ekki að vera að blogga um það sem ég er margbúin að segja og allir vita að er rétt. Ég held að 75 % þjóðarinnar séu komnir á skoðun FF en eins og var með skoðun þjóðarinnar á kvótamálum þá er það bara skoðun en ekki eitthvað til að framkvæma. Verði þeim að góðu. Þetta verður spennandi með þessa kosningu um tvöfalda atkvæðagreiðslu og afar fyndið að Þráinn nenni ekki að vera að spyrja þjóðina heldur vill að Alþingi ákveði þetta bara  kveðja Kolla.

[Magnús Geir Guðmundsson, 17.7.2009 kl. 19:09]

Hahahaha, fjöldamorð og klám í Kollu boði!

Það gerist ekki öllu betra!?

[Kolbrún Stefánsdóttir, 18.7.2009 kl. 15:21]

 Já en ekki hvað. Allt gert til að kitla hláturtaugarnar.  kveðja Kolla. 

[Magnús Geir Guðmundsson, 18.7.2009 kl. 21:25]

Bæði sæl og sómakær,

sýndist Kolla enn í gær.

En nú er orðin næstum ær,

niður brytjar köngulær!

[Magnús Geir Guðmundsson, 18.7.2009 kl. 22:25]

Þótt kunni á köllunum lag,

Kolla með glæsibrag.

Hún spúsa er spök,

sparar sín mök

Að mestu um miðjan dag!

[Kolbrún Stefánsdóttir, 20.7.2009 kl. 13:47]

Að mestu um miðjan dag

Maður er á þér lag?

Ja flest er fólk farið að spara,

ég segi það nú bara

alltaf góður kvennaljóminn

[Gísli Baldvinsson (IP-tala skráð) 20.7.2009 kl. 21:48]

Er þetta lífið í Kópavogi? Hér suða hunangsflugur.

[Kolbrún Stefánsdóttir, 20.7.2009 kl. 22:46]

Sæll Gísli. Nei nei það er nú yfirleitt friðsælla í Kópavogi en þetta og hægt að stunda sína heimilisleikfimi nokkurn veginn óáreitt. Það er bara hér á "Vesturbakkanum" sem þetta er svona erfitt. Ekkert er jú gerræðislegra en skapstyggar miðaldra konur sem búa einar kveðja Kolla.

[Magnús Geir Guðmundsson, 21.7.2009 kl. 14:03]

"Ekkert er gerræðislegra en skapstyggar miðaldra konur sem búa einar" hahaha, þú ert nú algjört met Kolbrún Stefánsdóttir, en að sjálfsögðu vekur "heimilisleikfimin" athygli og ég er alveg handviss um að "miðaldra skapstyggar.." breytast í "Ljúfustu ljónynjur" þar sem já "Fimin er einstök" hahaha!

Þú ert afbragð Kolla!

En nú væri líka afar freistandi að "gera sér mat enn meir", en stilli mig, gæti orðið klúr svo bannfæring vofði yfir!

[Kolbrún Stefánsdóttir, 23.7.2009 kl. 16:01]

Já Magnús endilega halda sig innan siðgæðismarka. Það er nú freistandi að svara þér með frægu svari forseta Bandaríkjanna en það gæti misskilist  þar sem við höfum aldrei hist svo ég viti. En afbragð það er ekki ofsagt hahaha. Takk fyrir kommentið. kveðja Kolla.

[Ólafur Ragnarsson, 25.7.2009 kl. 20:08]

Sæl kæra vinkona. einhvenveginn hefur þessi færsla farið fram hjá mér.  Ekki ætla ég að blanda mér í umræðuna enda heldur maður sig í vari hvað"suma"hluti varðar. En mig langar bara kommentera á viðskifti ykkar Magnúsar Geirs. Þau eru alltaf alveg mögnuð Kært kvödd bæði tvö