Skálholtsferð

Um síðustu helgi fór Landsvirkjunarkórinn í söngæfingaferð í Skálholt, ásamt stjórnanda okkar sem er ungversk kona sem heitir Kristzina. Sú er bæði stórskemmtileg og mikill músikant. Kórinn er 20 ára gamall og heldur úti metnaðarfullu starfi. Tónleikar á hverju ári og nú er stefnt út fyrir landsteinana í haust. Til stendur að heimsækja heimaland stjórnandans Ungverjaland og vera þar í eina viku. Nú er æft stíft bæði á íslensku og ungversku og meiningin að bjóða upp á góða og vandaða tónlist .

Við gistum í Skála en fengum morgunmat og hádegismat í Skálholti auk þess sem við skoðuðum kirkjuna. Á föstudagskvöldið eftir æfingu var svo kvöldvaka með gamansögum og bröndurum. Það var mjög skemmtilegt og gott að kynnast félögunum betur á þennan hátt, en ég er nýkomin í kórinn og þekki fáa.

Um þessa helgi var fólk úr safnaðarnefndum á Suðurlandi að funda í Skálholti og notuðum við tækifærið og sungum fyrir þau í hádeginu á laugardeginum.  Við æfðum svo um morguninn og um miðdaginn á laugardag.

Um kaffileytið var tekið strikið í bæinn. Það er svo langt síðan ég hef farið í rútuferðalag að ég söng fyrir minn sessunaut, gamla rútuslagara frá því í gamla daga eða síðan ég var ung, og hafði sjálf afar gaman að því.

Um kvöldið fór ég svo að sjá leikritið "Fjölskyldan" sem mér fannst nú ekki skemmtileg sýning en lýsir vel hvernig eiturfíknin eyðileggur líf fólks og sundrar fjölskyldum. Sýningin var full löng en tvö hlé og góður félagsskapur bætti það upp.

Athugasemdir

[Númi (IP-tala skráð) 16.3.2011 kl. 15:08]

Mátti til með að leggja orð í belg hér á bloggi þínu Kolbrún. Þú virðist hræra í ýmsustu málum og áhugamálin þín fjölmörg,líkt og hér söngurinn. Í hitteðfyrra fór ég í fyrsta sinn inní Skálholtskirkju,þó er ég búinn að aka þarna framhjá margsinnis. Ég var svo heppin að þarna var að byrja kórsöngur,og þar var á ferðinni kórfélagar úr M H og Þorgerður sú eina sanna var stjórnandin,og hvílíkir tónleikar söngurin alveg einstakur og hljómurin í kirkjunni frábær. Þetta er mér ógleymanleg stund,og þetta unga fólk er þjóðinni til sóma frábær kynslóð sem tekur við af okkur,það er svo.  Kolbrún,fjörkálfur hafðu það ætíð sem best.

[Helga Kristjánsdóttir, 16.3.2011 kl. 18:31]

Skálholt er mikið sótt af kórum og orgenleikurum. Þangað fer tengdasonur minn (fyrrverandi)  árlega með kollegum sínum en hann er organisti á Egilsstöðum og Kórstjóri hann er norskur.,Ekki langt síðan hann var þar,kemur alltaf við hjá sinni gömlu tengdó. Mér finnst fólk áberandi hamingjusamt að vera í þessum félagsskap. Freðalög til útlanda er einn skemmtilegur liður í þessu  ,,hobby,, Mb.kv. 

[Kolbrún Stefánsdóttir, 16.3.2011 kl. 20:20]

Sæll Númi. Já ég er ekki við eina fjölina felld eins og sagt er og víða liggja leiðir hvað áhugamál varðar. Ég hef þó mestan áhuga á mannlífinu og fólki. Hitt er meira leiðir til að nálgast fólk og njóta samvista við það. Varðandi sönginn þá er hann nánast meðfæddur því það var alltaf mikil tónlistariðkun á mínu æskuheimili. Hef t.d verið í kór frá 16 ára aldri og tók svo hlé frá 1997 til 2010 og er semsagt byrjuð í þessum kór sem um ræðir. Takk fyrir skemmtileg samskipti á bloggi Björns í dag og fyrir öll fallegu uppnefni þó ég sé nú ekki sammála þessu oflofi. Jú ég er auðvitað fjörkálfur á blogginu og læt ýmislegt flakka og vona að mér líðist það. kveðja til þín

[Kolbrún Stefánsdóttir, 16.3.2011 kl. 20:23]

Sæl Helga. Hamingjusamt fólk segirðu. Ég er alveg viss um að það er mun meiri heilsubót í því að syngja en margir halda. Það er ekki bara ánægjulegt og gefandi heldur svo gott fyrir líkamann. Maður verður að anda rétt og þetta kallar á heilbrigða slökun. Held að það hafi hjálpað mér að komast í gegnum hryllilegt stresstímabil á Snæfellsnesinu á sínum tíma að vera í kórnum. Kveðja Kolla

[Sessunauturinn (IP-tala skráð) 17.3.2011 kl. 15:08]

Það var yndislegt að hlusta á rútusönginn þinn Kolla mín og helgin var frábær.