Pósturinn

Þá er kominn tími til að keyra út jólapakkana. Þetta er eini siðurinn sem ég held uppá í jólahaldinu. Það var alltaf þannig í mínu ungdæmi og öll mín hjónabandsár að farið var í að keyra út pakka og kort á aðfangadag, stundum í vitlausu veðri, snjó og skafrenningi. Stundum þurftu menn að hjálpast að við að ýta bílum sem voru fastir og það var meiriháttar gaman. Þá myndaðist þessi skemmtilega gleði og nánd sem jólaboðskapurinn byggir á að því mér skilst. Reyndar er ég alveg hætt að senda jólakort og það var mjög gott að losna frá því. Ég átti það til að verða óskaplega væmin og hjartanleg þegar ég var að skrifa kort. Pakkarnir hanga inni ennþá og það er svo sem allt í lagi. Allavega meðan ég fæ pakka sjálf ;) :)

Gleðileg jól kæru bloggfélagar og aðrir lesendur.

Athugasemdir

[Atli Ágústsson (IP-tala skráð) 24.12.2009 kl. 10:27]

Sæl Kolla. Ég kannast við þennan sið að keyra út pökkum á aðfangadag síðan ég bjó á Ísafirði og fannst þetta skemmtilegur siður, aðeins að hitta fólkið og þiggja kaffisopa og smáköku. I dag koma börnin og barnabörnin til mín í skötuveislu á Þorláksmessu og við skiptumst á gjöfum þá. Barnabörnin vita alltaf hvaða pakkar eru frá mér. Það er skötulykt af þeim.

Ég spurði dótturdóttur mína sem er að verða 15 ára hvað væri minnistæðast við jólin þegar hún var yngri. Hún sagði :"það var hvað þú borðaði mikið afi og varst lengi að því og ótrúlega erfitt að bíða eftir að þú værir búinn þannig að hægt væri að fara að opna pakkana"

Jólakortin skrifa ég ennþá og finnst bara allt í lagi að vera svolítið væminn og hjartanlegur við það. Það besta við jólin finnst mér vera gleði og eftirvænting barnanna, sérstaklega þeirra yngstu.

Gleðileg jól Kolla og hamingjuríkt nýtt ár. Kærar þakkir fyrir skemmtilegt blogg. Bestu kveðjur, Atli

[Kolbrún Stefánsdóttir, 24.12.2009 kl. 13:07]

Já ætli það hafi ekki verið svona í flestum þorpum landsins hér áður fyrr. Bloggið mitt er eins skemmtilegt og bloggvinirnir sem kommenta á færslurnar mínar. Mér finnst vænt um að fólk skuli hafa samskipti og deila skoðunum sínum með mér. Þú þar á meðal. Besta kveðja og óskir um hamingjuríkt ár. Bið fyrir kveðjur til Ágústu dóttur þinnar. Kolla.

[Jón Snæbjörnsson, 24.12.2009 kl. 15:37]

Gleðileg Jól

[Kolbrún Stefánsdóttir, 24.12.2009 kl. 16:34]

Gleðileg jól Jón og takk fyrir samskiptin á árinu. Þau hafa verið með eindæmum skemmtileg. Kveðja Kolla.