19.júní.

Í dag er 19 júni og það er einn af mínum uppáhaldsdögum. Ekki bara af því það er kvennadagurinn og upphaf af þeirri réttindabaráttu sem þá hófst og stendur enn, heldur af því það eru margir góðir og skemmtilegir atburðir sem tengjast þessari dagsetningu úr mínu lífi. Til dæmis fékk ég uppfylltan langþráðan draum minn um menntun þegar ég útskrifaðist úr rekstrar og viðskiptafræði úr EHI fyrir akkúrat 10 árum síðan. Í því námi eignaðist ég sjö frábæra vini en það var hópur sem fór að læra saman í náminu og hefur haldið saman síðan í gegnum þykkt og þunnt, sorg og gleði. Einn þeirra er nú látinn. Annað sem átti sér stað á þessum degi er að ég flutti inn í núverandi húsnæði mitt á þessum degi og sama var með það sem ég átti áður. Ekki stendur til að endurtaka þann leik oftar enda er ég afar ánægð með mig í mínu koti. Það er meira en yndislegt að búa í Kópavogi og ég tala nú ekki um þegar næturkyrrðin og fegurðin tekur alveg yfir en það gerist oft á sumarkvöldum. Ég vona að sem flestir eigi gott og friðsamt heimili og óska öllum konum til hamingju með daginn þó hann sé að kveldi kominn. Hann er okkar helsti baráttudagur og vonandi verður hann það um ókomna tíð.

Athugasemdir

[Hallgerður Pétursdóttir (IP-tala skráð) 19.6.2009 kl. 23:51]

Takk fyrir þennan ljúfa lágstemmda texta.   Svo innilega hvílandi...

[Kolbrún Stefánsdóttir, 20.6.2009 kl. 01:23]

 Já eru menn ekki bara að verða þreyttir á pólitísku argaþrasi og hörmungarsögum. Til hamingju með daginn Hallgerður. Ég held að þú sért líka mikil kjark- og baráttukona. Bestu kveðjur í þitt kot. 

[Steinar Frímannsson (IP-tala skráð) 21.6.2009 kl. 21:27]

Sæl Kolla

Jæja, eru tíu ár síðan við útskrifuðumst.   Þetta var skemmtilegur tími og við lærðum ekki einasta af kennurunum heldur var líka mjög lærdómsríkt að vera í þessum hópi.  Takk fyrir það.   Og þetta nám er það besta sem ég hef kynnst og hef þó kynnst ýmsu síðan. 

Kveðja

Steinar Frímannsson

[Kolbrún Stefánsdóttir, 21.6.2009 kl. 23:59]

Sæll Steinar. Frábært að sjá þig hér með komment. Já þetta var góður tími og eins og ég segi við tengdumst öll nokkuð vel. Þú varst nú dúxinn í náminu og það var í eina skiptið sem ég fékk fulla tíu þegar ég var með þér í verkefni. Ég fór svo í starfsmannastjórnun og það var enn skemmtilegra því þá var maður meira að viðra sínar skoðanir og reynslu en að læra nýtt þannig að það var enginn prófskrekkur í manni þar. Hópurinn sem ég var í þar ætlar að hittast í vikunni. Það er frábært þegar maður nær að mynda tengsl sem haldast í raunveruleikanum því það er jú gagnsemin af þessu. Námið í sjálfu sér úreldist nema maður haldi áfram að  nýta það og æfast í aðferðafræðinni. Bestu kveðjur til þín.