Þú getur treyst okkur

Nú er komið að Alþingiskosningum og  hefur þessi kosningabarátta verið í styttra lagi. Hún hefur einkum farið fram í sjónvarpi og á hinu háa Alþingi sem nú er að standa upp frá  karpi um mismerkileg málefni. Þetta kemur sér afar illa fyrir framboð sem ekki hafa fjármagn og þurfa að reka sína kynningu sem fótgönguliðar, maður á mann. Það þurfum við að gera í Frjálslynda flokknum. Margir eru enn að velta því fyrir sér hvað skuli kjósa. Sjálfstæðisflokkurinn hefur opinberað sig í spillingu við fyrirtæki sem hafa styrkt þá um tugi milljóna, úr innsta hring útrásarvíkinganna, og sofið á vaktinni. Framsókn hefur alltaf flotið á yfirboðum. Nú síðast voru þeir að lofa lækkun áfengiskaupaaldurs í Menntaskólanum í Kópavogi. Allir muna loforð þeirra um 80 % lánshlutfall hjá Íbúðalánssjóði sem orsakaði þá þenslu sem við verðum nú að súpa seiðið af og núna á að afskrifa flatt, á ríka og fátæka, 20% af skuldunum. Samfylkingin vill afsala sjálfstæði þjóðarinnar til Evrópusambandsins þar með yfirráðum yfir  sjávarútvegi, landbúnaði, og olíulindum sem talið er að séu við landið, stærri en þær norsku sem hafa haldið Norðmönnum utan ESB. Þá eru Vinstri grænir eftir en þeir  ætla í stjórn með Samfylkingunni en segjast samt ekki vilja ganga í Evrópusambandið. Þeir lofa því að hækka skatta og lækka laun þannig að það verður þá lítið í buddunni til að halda samfélaginu gangandi eftir að þeir koma sinni stefnu í framkvæmd. Varla verður það hvatning til að byggja upp atvinnuvegina. Þetta er mín sýn á fjórflokkinn sem hefur haldið um stjórnartaumana undanfarin ár. Frjálslyndi flokkurinn hefur átt fulltrúa á þingi í tíu ár og aldrei komið að stjórn þjóðfélagsins með beinum hætti. Fulltrúar hans hafa verið óþreytandi að benda á óréttlætið í kvótakerfinu og staðið vörð um fjölskyldur, sjómenn, bændur og byggðir landsins.Ég bið um stuðning þinn á kjördag.

Athugasemdir

[Ásthildur Cesil Þórðardóttir, 24.4.2009 kl. 00:39]

Kolbrún mín ég segi bara gangi þér vel á laugardaginn, ég ætla að krossa fingur við ykkur öll sem leiðið lista Frjálslyndra kring um landið.  Megi ykkur öllum ganga sem best. Okkar rödd þarf að heyrast á þingi, því það er eina röddinn sem hefur haldið óréttlæti fiskveiðikerfisins gangandi, hinir flokkarnir taka þetta upp korteri fyrir kosningar, og gleyma því svo næstu fjögur árin.  Sorglegt en satt. 

[Jón Valur Jensson, 24.4.2009 kl. 00:53]

Já, ég hygg, að þrátt fyrir mannlegan breyzkleika ykkar eins og annarra, í ykkar tilfelli hvað varðar samheldni og eindrægni, þá muni samt margir treysta ykkur betur í þessum kosningum en hinum afar þreytta Fjórflokki (sér í lagi mínum flokki og Samfylkingu). Atburðir síðustu daga og ágæt frammistaða, það sem ég hef séð, á borgarafundum í Sjónvarpi, t.d. hjá Sturlu í fyrrakvöld, hygg ég að muni stórauka fylgi ykkar, og þar að auki svara ekki nema um 60% í skoðanakönnunum, en um 89% ætla að kjósa, og ég býst við að þið eigið margan stuðningsmanninn meðal þessara ca. 29%, sem á milli ber. Það er sannarlega betra að kjósa ykkur en að skila auðu.

[Hilmar Gunnlaugsson, 24.4.2009 kl. 01:25]

Er fylgi flokksins ekki 1%?

[Jón Valur Jensson, 24.4.2009 kl. 01:36]

4,7% í skoðanakönnun sem fór af stað á þriðjudaginn kl. 11 á vefsíðu minni.

9,3% í NV-kjördæmi skv. Gallupkönnun þar fyrir helgina, og það mundi nægja Guðjóni Arnari til að ná á þing. Ég spái Sturlu þingsæti.

[Hilmar Gunnlaugsson, 24.4.2009 kl. 01:40]

Tekur þú könnunina á síðu þinni alvarlega? O listinn er þar með 24% atkvæða. Eigum við ekki frekar að treysta á Gallup?

Hlutdræga könnun flokksins í NV-kjördæmi hef ég fjallað um á síðu minni. Hún er ómerk.

[Jón Valur Jensson, 24.4.2009 kl. 02:07]

Treystum engum könnunum Hilmar.

En hlutir eru að gerast í þessari viku, enginn getur þrætt fyrir það; jafnvel harðir Sjálfstæðismenn eru farnir að tala um að skila auðu. Einnig er talað um massífar útstrikanir Guðlaugs Þórs (hefðu þær áhrif? Já, t.d. ef hann hrekkur niður um tvö sæti eða meira, þá kemur hann alls ekki til greina sem ráðherra). Aðrir kjósa kannski Framsókn eða Frjálslynda.

Á minni síðu hefur O-listinn lafað í 30% lengstum, en fór jafnvel upp í 40% á fyrstu klukkustundunum, og tek ég lítið mark á því. Nú eru þáttakendur komnir upp í 150, sem er vissulega ekki mikið og segir því litla sögu.

[Hilmar Gunnlaugsson, 24.4.2009 kl. 02:19]

Jæja, við skulum bíða til Laugardagsins

[Jón Valur Jensson, 24.4.2009 kl. 02:30]

Já, og gleðilegt sumar, Hilmar og Kolbrún.

PS. Ég verð í Útvarpi Sögu kl. 12.40–13.00 í dag, föstudag, – síðasti sjens að skamma stjórnmálamennina þar fyrir kosningar!

[Hilmar Gunnlaugsson, 24.4.2009 kl. 03:32]

Gleðilegt sumar Jón.

[Kolbrún Stefánsdóttir, 24.4.2009 kl. 08:10]

Sæl verið þið og takk fyrir hlýleg innlegg þið tvö Jón og Ásthildur. Gleðilegt sumar öll saman. Það er rétt að það er einkennilegt hvernig þessir flokkar vinna. Ég vona að stefna FF fái sem flest atkvæði til að það komi skýrt fram að fólkið vill breytta kvótastefnu og eins að það vill halda sjálfstæði þjóðarinnar enda búið að ræna okkur flestu öðru. Við munum berjast til síðasta manns fyrir þjóðina en ef hún vill eitthvað annað þá er það bara þannig. Ég ætla, af virðingu við þig Jón Valur, að stilla yfir á Sögu og hlusta á þig. Annars er ég alveg hætt að hlusta á þessa rás og mín vegna mætti hún alveg missa sig. Ég vil bara minna þig á að FF er flokkur og hann hefur aldrei þegið mútur eða styrki. Bestu kveðjur Kolla. 

[Jón Valur Jensson, 24.4.2009 kl. 09:39]

Kolbrún, takk fyrir þetta, en gættu þess, að Útvarp Saga er ekki uppfull af neikvæðu tali um Frjálslynda, fremur njóta þeir stuðnings þar, ef fráskilinn er Eiríkur Stefánsson. – Með góðri kveðju,

[Gísli Baldvinsson (IP-tala skráð) 24.4.2009 kl. 10:20]

Bara smá athugasemd svona í lokin, Kolbrún, sem þú verður að hafa á hreinu þegar/ef þú kemst á þing: -"Samfylkingin vill afsala sjálfstæði þjóðarinnar til Evrópusambandsins-"  Það er skilgreiningarmunur á "sjálfstæði" og "fullveldi". Öll ESB ríkin eru sjálfstæð en hafa afsalað sér hluta af fullveldisákvöruðum sínum. Það gerðum við einnig með EFTA og EES samningum. Það hefur aldrei komið fram skýrt hvort FL vill aðild að ESB ef öllum skilyrðum um fiskveiðistjórnun sé uppfyllt. Heldur ekki viðhorf flokksins varðandi skattamál. En vonandi fáið þið meir en 1% Það eigið þið skilið eftir samvinnu sl. 80 daga.

[Kolbrún Stefánsdóttir, 24.4.2009 kl. 10:39]

Þið gleðjið mig báðir tveir, takk fyrir það. Ekki hef ég orðið vör við mikinn stuðning á Útvarpi Sögu, Jón. Maður hefði getað haldið að þessir fréttamenn þar hefðu séð ástæðu til að tala við varaformann FF eftir dramatískar lýsingar "fréttaskýranda stöðvarinnar" Eirík Stefánssonar en það hefur aldrei verið hringt í mig frá þessari stöð sem gefur sig út fyrir að gæta réttlætis og lýðræðis. Ég hef ákveðnar hugmyndir um "Söguklúbbinn" en held þeim fyrir mig að sinni. Kveðja Kolla. 

[Kolbrún Stefánsdóttir, 24.4.2009 kl. 11:09]

Sæll Gísli. Já ég tek stórt upp í mig þegar ég segi sjálfstæði. Ég óttast hinsvegar að við munum ekki hafa nægilegt vægi til að stjórna eigin málum ef Samfylkingin afhendir restina af fullveldinu til ESB og þá er sjálfstæðið farið og sá drifkraftur sem felst í því fyrir þjóðina að vera sjálfstæð og fullvalda. Fl ertu þá að meina Frjálslynda? Ég get svarað því að við erum ekki bara að hugsa um sjávarútveginn heldur líka vatnið , orkuna, olíuna jarðvarmann og bændur og öryggi sem þjóðin þarf að  hafa í sterkum landbúnaði. Styrkjabúskapur er mér ekki að skapi og því höfum við talað um búsetustyrki af því það er hagur allrar þjóðarinnar að landið sé í sem dreifðastri byggð. Viðhorf okkar til skattamála eru þau að við erum á móti því að skattleggja einstaklingana frekar en orðið er. Gæta þarf sérstaklega að þeim sem eru á lægstu laununum því við höfum lagt ofuráherslu á velferðarkerfið.  Takk fyrir leiðsögnina en ég geri reyndar greinamun á þessu tvennu vonandi þið líka. Bestu kveðjur og "by the way" við erum alltaf samvinnufús til góðra mála. Kolla.

[Jón Valur Jensson, 24.4.2009 kl. 15:36]

Gísli, við afsöluðum engu af fullveldisákvörðunum okkar með EFTA-aðildinni (og hana er NB hægt að kalla aðild, ólíkt innlimun í EBé).

EFTA er ekki og stefnir ekki að sambandsríki og heimtar ekkert löggjafarvald yfir okkur eins og EBé gerir við sín ríki.

EES-samningurinn var vissulega mjög hæpinn, en við höfum þó vald til að beita okkur á 1. stigi með hinum aðilum hans að því að aðhæfa lagaákvæði og reglur að okkar aðstæðum og þörfum, eins og Björn Bjarnason hefur bent á (sem og, að við höfum allt of lítið notfært okkur þann rétt), og á 2. stigi höfum við vald til að fresta og neita því að meðtaka þau lög og reglur og á 3. stigi að segja okkur frá þeim samningi, ef við viljum.

Allt öðru máli gegnir um Evrópubandalagið, sem vill hér: framsal á ríkisvaldi til Brussusels, löggjafarvald yfir okkar málum (en í Gamla sáttmála gerðum við hins vegar það að samningsbundnu skilyrði, að við fengjum að hafa hér íslenzk lög), æðsta dómsvald og æðstu og úrsita-yfirráð yfir fiskveiðiauðlindinni.

Þú ert á miklum villigötum, Gísli, ef þú hyggur þjóðina vilja þetta!

Jafnvel í Reykjavík norður, þar sem Samfylkingin nýtur 33% stuðnings skv. skoðanakönnun Fréttablaðsins og Stöðvar 2, sem birt er á bls. 4 í Fréttabl. í dag, þar kemur áberandi áhugaleysi kjósenda á Evrópubandalaginu glöggt í ljós í viðhorfskönnun, sem birt er á sömu síðu – og er í takt við aðrar slíkar úr öðrum kjördæmum, sem hafa verið að birtast í blaðinu að undanförnu. Svarendur gáfu þar málefnum einkunn í "mikilvægisröð", og hvar kemur EBé fram á þeim lista? Jú, í 6. sæti, en röðin er þannig: 1) efnahagsmál, 2) velferðarmál, 3) menntamál, 4) skattamál, 5) fiskveiðimál, 6) Evrópumál, 7) samgöngumál.

Láttu þér þetta nú að kenningu verða.

[Ágúst Ásgeirsson, 24.4.2009 kl. 16:27]

Ég vona að þú fáir hlutfallslega fleiri atkvæði upp úr kjörkössunum, Kolla,  en skoðanakannanir benda til. Alla vega óska ég þér góðs gengis héðan úr veðurblíðunni í Frakklandi. Já, gleðilegt sumar! Franski sumardagurinn er ekki fyrr en 22. júní, hér var fyrsti vordagur 22. mars. En veðurstofan segir vetri lokið 1. mars svo árstíðaskiptin eru soldið flókin hér um slóðir . . .

[Gísli Baldvinsson (IP-tala skráð) 24.4.2009 kl. 17:24]

Smá til JVJ: Allir samningar er afsal af fullveldi. Af því þú ert þrælmenntaður í hjúskap: Hjúskapur er t.d. afsal á fullveldi! Ég átti við EES samninginn frekar ef EFTA. Ef KS hefur rétt fyrir sér varðandi afsal á orkulindum mæti ég við bresku kolanámurnar við inngöngu í ESB!

[Jón Valur Jensson, 24.4.2009 kl. 17:57]

Ef þú áttir við EES-samninginn frekar en EFTA, hvað varstu þá að nefna EFTA?!

Svo er þín fullyrðing: "Allir samningar eru afsal á fullveldi," alhæfing sem er á engan hátt sjálfljós sannindi og heldur ekki sönnuð hjá þér með rökleiðslu.

[Kolbrún Stefánsdóttir, 24.4.2009 kl. 19:01]

Sælir. Ég hef ekki miklu við þetta að bæta. Jón Valur er búinn að grilla þig alveg Gísli minn og best fyrir þig að mæta í námurnar í Bretlandi sem enginn vill vinna í frekar en frystihúsin okkar. Sumir karlar tala um að þeir missi fullveldi og sjálfræði þegar þeir fara í sambúð. Ekki skynsamleg röksemdafærsla en kannski eitthvað til í því. Jón Valur. Takk fyrir gott verk þitt í dag á Útvarpi Sögu. Gísli konur eiga að vera undirgefnar vissirðu það ekki  kveðja Kolla.

[Ólafur Ragnarsson, 24.4.2009 kl. 20:34]

Mín kæra vinkona. Nú er að duga eða drepast. Og ég held við dugum. Og á sunnudag verðir þú í algerri andstöðu við stöðu þína á degi eftir kosningarnar síðast. Megi guð og gæfan fylgja þér á morgun. Sértu ávallt kært kvödd

[Kolbrún Stefánsdóttir, 25.4.2009 kl. 08:55]

Sæll félagi Ólafur. Bestu þakkir fyrir þínar óskir. Nú leggjum við þetta í hendur Guðs  og góðra manna  og tökum því sem að okkur er rétt. Ég mun þó berjast með hjartanu til síðasta manns og minn hópur einnig. Eigðu góðan dag og vonandi heyrumst við í kvöld en þá er kosningavaka á Nýbýlavegi 18 þar sem við erum með kosningaskrifstofu. Allir velkomnir kveðja Kolla.

[Kolbrún Stefánsdóttir, 25.4.2009 kl. 08:58]

Hi Gústi. Er allt svona flókið í Frakklandi? Getur verið að þessir örfáu frönsku blóðdropar mínir séu ástæðan fyrir því að ég er svona flókin og erfið  ? Það skyldi þó aldrei vera. Bestu þakkir fyrir góðar óskir mér til handa og gleðilegt sumar hvenær svo sem það telst vera komið í Frans kveðja Kolla

[Ágúst Ásgeirsson, 26.4.2009 kl. 16:15]

Jæja, meðan ekki er komin ný færsla eftir kosningar, drep ég niður penna hér! Þú verður að taka þessu hundsbiti, að flokkurinn er horfinn af þingi. Það jákvæða er að þú fékkst meira upp úr kjörkössunum en kannanir bentu til.

Nú hlýtur það að vera næsta skref að formaðurinn biðjist lausnar, maðurinn sem stýrði flokknum til þeirrar niðurstöðu sem nú blasir við. Mér finnst hann eigi að standa upp strax og víkja og fela varaformanni sínum valdataumana.

Ég er sannfærður um að það sé ekkert annað en innanflokkserjurnar frá síðustu kosningum sem fara svona með Frjálslynda flokkinn. Og það verður að skrifa það á Guðjón Arnar að verulegu leyti. Hann á eftir að segja væntanlega einhvern tíman frá því sem á gekk að tjaldabaki. En maður verður að álykta sem svo að hann hafi ekki haft þá lagni, færni og kraft til að bera til að leysa deilur og koma í veg fyrir að upp  úr syði. Ekki bara einu sinni, ekki bara tvisvar, heldur a.m.k. þrisvar.

Þú verður að taka við flokknum ef hann ætlar að starfa áfram.

[M&M (IP-tala skráð) 26.4.2009 kl. 20:30]

Hver er þessi Hilmar vitleysingur og rasisti? Ég hef verið að skoða bloggið og hann virðist gúggla allt sem viðkemur Frjálslyndir og henda inn orðinu "rasisti". Af myndini af dæma þá talar hann örugglega með nefinu!

[NN (IP-tala skráð) 26.4.2009 kl. 21:52]

       ÞÁ   ER  ÞAР   BÚIÐ.

[Kolbrún Stefánsdóttir, 26.4.2009 kl. 22:38]

Sæll Ágúst. Þakka þér fyrir það traust sem þú sýnir mér en ég hef ekki verið að sækjast eftir meiri völdum í flokknum þó menn gætu ályktað sem svo. Ég t.d. lagði til að aðrir en ég leiddu hér í SV að þessu sinni en það gekk ekki eftir. Ég þykist vita að GAK geti skrifað langan reyfara um þessi tvö síðustu ár í lífi flokksins og það gæti ég svo sem líka en það bíður betri tíma. Maður getur velt því fyrir sér hvað fór úrskeiðis og hvar okkur bar af leið en það breytir ekki því að við erum á núllpunkti. Við munum fjalla um þessi mál með okkar fólki á næstu dögum trúi ég og ræða framtíðina sem er ekki allt of björt.

Það tekur ekki langan tíma að sjá hvernig VG og Samfylkingin munu svíkja sín loforð og hver verður þá til að tala máli sjómanna, bænda og öryrkja. Jóhanna hefur verið talsmaður fatlaðra á þingi en nú er hún við stýrið og það er varla gott fyrir þann málstað. Meira síðar kveðja Kolla.

[Kolbrún Stefánsdóttir, 26.4.2009 kl. 22:46]

M&M. Ég veit ekki hvaða maður þetta er og alls ekki hvernig hann talar . Ég held að hann sé eini maðurinn sem hefur talað um "rasista " í sambandi við Frjálslynda í þessari kosningabaráttu og það er kannski ástæðan fyrir fylgistapinu Hann er eitthvað mikið markeraður af rasistaumræðu aumingja maðurinn.

NN það er búið þegar það er búið og ekki er öll nótt úti enn. Ástþór mun líklega kæra mismunun í fréttaflutningi og kynningartíma á ríkisfjölmiðlum og kosningarnar endurteknar í kjölfarið . Það sannast líklega núna að enginn veit hvað átt hefur fyrr en misst hefur. Bestu kveðjur Kolla.

[Magnús Geir Guðmundsson, 27.4.2009 kl. 23:54]

Ertu núna Kolla kær,

kannski sár og hnuggin

áður fögur yngismær,

orðin föl og guggin?

[Kolbrún Stefánsdóttir, 28.4.2009 kl. 00:26]

Fálát og með föla kinn

fallin, vonlaus, galin

Ekki verð ég, unginn minn

aðlaðandi talin

[Magnús Geir Guðmundsson, 28.4.2009 kl. 01:06]

Hahaha, yndislegt svar til baka, þó innihaldslýsingin yrði seint metin falleg.

Hundleiður að sjá ekki betri útkomu fyrir þig, þótt nú margt benti ekki til beinlínis stórsigurs, áttir nú betra skilið.

[Kolbrún Stefánsdóttir, 28.4.2009 kl. 10:42]

Takk fyrir það minn kæri bloggfélagi. Við gerðum okkar besta þó við ramman reip væri að draga bæði innan og utan flokksins og fáir til að leggja hönd á plóginn. Það er nú einhvernvegin þannig að sumir eru bestir í að rífa niður og þannig mönnum hef ég kynnst upp á síðkastið. Það er þó með þetta eins og allt annað maður jafnar sig  ekki síst þegar maður á góða bloggfélaga. Takk fyrir vísuna hún er frábær . kveðja Kolla.