Síðasta vika.

    

Síðasta vika var afar skemmtileg og mjög pökkuð svo ekki sé meira sagt. Á mánudagsmorgun kl 6.3o sprautaðist ég fram úr rúminu og eftir hefðbundinn morgunverð sótti ég systur mína og kom henni á Landspítalann kl 7.30.  Síðan beint í vinnuna og vann til kl 17.00 en þá var  söngæfing fyrir hæfileikakeppni sem Ný-ung stóð fyrir . Þegar hún var afstaðin fór ég á spítalann til Sæku. Kom heim kl 22.00 og kíkti þá á bloggið.

Þriðjudagur var strembinn í vinnunni en þá var formaður mættur á staðinn og við unnum saman við að skipuleggja Þing Sjálfsbjargar sem haldið verður í maí. Ég skrapp þó til háls-nef og eyrnalæknisins Einars Thoroddsen sem mér finnst afar skemmtilegur maður enda búin að bíða eftir tíma hjá honum lengi. Viðtalið tók hálftíma. Eftir vinnu var aftur söngæfing og síðan fór ég og hitti foringjann í Frjálslynda flokknum og þingmenn í afar yndislegu vorverði og útistemmingu við Austurvöll. Hélt að vorið væri komið en Guðjón kom vitinu fyrir mig og sagði mér sögu af Vestfirðingi sem var stundum að fagna vorinu of snemma og var svo hundskammaður þegar fór að snjóa strax á eftir. Um kvöldið fór ég á ræðunámskeið sem haldið er hjá Sjálfsbjörg þessa dagana . Það var mjög skemmtilegt og mikið hlegið.

Miðvikudagurinn var svipaður nema snjór yfir öllu. Ég borðaði með endurskoðandanum mínum í hádeginu. Hann var nú hálf þreyttur en þegar hann var búinn að  næra sig þá fór nú að lyftast á honum  brúnin. Hann hefur gaman af því að þykjast vera karlremba en honum hefur ekki enn tekist að ná mér upp út á það, heldur hef ég alltaf sýnt mikið umburðalyndi eins og þetta sé bara venjuleg fötlun hjá honum og ekkert við henni að gera. Hann var allavega hlæjandi þegar ég kvaddi hann og þá er allt gott. Eftir vinnu kl 17.30 var fundur hjá málefnanefnd um heilbrigðismál á vegum Frjálslynda flokksins en við leiðum það starf ég og Guðrún María Óskarsdóttir aðstoðarmaður Grétars Mar Jónssonar. Við fengum einn félaga okkar lækninn Gunnar Skúla til að koma á fundinn og þetta var afar fróðlegt fyrir mig sem hef lítið haft af heilbrigðismálum að segja (utan að vera læknaritari á heilsugæslustöð en skildi nú  lítið í latínunni sem þeir notuðu læknarnir í sjúkrafælunum). Ég verð því að draga mína ályktanir af reynslusögum annarra. Ég sit líka í nefnd um þátttöku neytenda í lyfjakostnaði sem er pólitísk nefnd á vegum Alþingis og þar koma fram mjög magnaðar upplýsingar um neyslu lyfja og kostnaðarþátttöku hins opinbera í samanburði við önnur lönd. Eftir fundinn sem stóð til 19.00 fór ég á spítalann og var þar til  22.00

Fimmtudagur annasamur en góður samt . Eftir vinnu var æft í hálftíma með Einari Andréssyni sem spilaði undir á hljómborð og síðan kíkt inn á fund hjá FUF , félag um fötlunarrannsóknir, vegna undirbúnings fyrir ráðstefnu sem haldin verður 18 apríl n.k. Þá var vinkona mín komin svo við drifum okkur í búð til að velja á hana ný golfföt því nú er hún loksins að hefja sinn golfferil og byrjar með stæl í flottum fötum úr Nevada bob og hjá besta golfkennara sem hún getur fengið Ragnhildi Sigurðardóttur vinkonu minni í golfferð á Spáni. Fórum þaðan á Ruby Tuesday á Höfðabakkanum og ég gleypti í mig salat og brunaði síðan, með kálið í hálsinum, á sænskunámskeið sem nota bene var afar skemmtilegt, mikið hlegið bæði á íslensku og sænsku. Það var búið um 21.30 og þá var  ég orðin hálf þreytt en dreif mig samt í dansinn í Drafnarfellinu í smá tíma. Það er mjög góð leið til að hreinsa út þreytu og streitu að dansa við fjörug lög við flinka dansara.

Föstudagurinn var tekinn snemma og reynt að reka endahnúta á nokkur mál sem hafa verið að gerjast á skrifborðinu. Fundur með bókara, skrifstofustjóra og endurskoðenda og starfsmanni hjá honum og reynt að finna tíma fyrir fund til að kynna ársreikningana og gera áætlun um vinnu við þá. Þá tók við smá æfing fyrir keppnina sem auðvitað var ekki keppni heldur bara uppistand og stuðningur við þessa hugmynd unga fólksins. Á leiðinni heim til að gera sig klára fyrir matarboð hjá dótturinni kl 19.00 -hringdi hin dóttirin og bað mig að koma með sér á Borgarspítalann til að láta kíkja í eyrun á syni hennar og yndinu mínu , Björgólfi litla,  sem er 15 mánaða og fór í nefkirtlatöku á miðvikudaginn. Hann var svo æðislegur og sætur að það jafnast ekkert á við hann nema ef vera skildi synir hinnar dótturinnar sem eru 10 og 15 ára. Ég náði samt að komast í matinn , grillaðar lambalundir, en varð að stökkva af stað kl 19.50 til að koma á réttum tíma á skemmtikvöldið því ég var fyrst á dagskránni.  Ég flutti lag og texta sem ég samdi fyrir  tveimur árum og annað lag við texta sem ég samdi fyrir tuttugu árum. Þetta gekk ágætlega og ég tók meira að segja þátt í Carokee seinna um kvöldið . Það var bara auðvelt þar sem textinn rúllar á sjónvarpsskjá og undirleikur af hljómdiski. Komin heim hress og kát kl 24.00

Laugardagsmorgunn tekin eins og vanalega í að lesa blöðin og horfa á eina mynd á bíórásinni og væla smá yfir henni. ( alltaf einhverjar konumyndir á laugadögum þar) Kíkti síðan til Biggu dóttur minnar því ég vissi að hún var að passa Björgólf litla um nóttina .Þaðan beint á fund hjá Frjálslyndum í Kraganum í húsnæði flokksins í Skúlatúni 4 kl. 11.00 . Eftir hann var kvennahreyfing FF með opinn súpufund með fyrirlesara af bestu sort Guðmund Ólafsson hagfræðing. Hann var fasmikill og sjálfsöruggur eins og sá sem allt veit en fór allt of snemma. Ég var ekki hrifin af hans málflutningi að þessu sinni. Eftir þann ágæta fund fór ég beint á  langþráð námskeið í Swingi.. Laugardagskvöldið var rólegt og var ég bara að kíkja á blogg og hlusta á söngvakeppni framhaldsskólanna. Sunnudagurinn var góður. Fór og heimsótti Biggu dóttur mína sem enn var með Björgólf þannig að ég hitti öll barnabörnin í einu en það finnst mér auðvitað langskemmtilegast. Við hlustuðum saman á vinsælasta bloggara landsins Jónu Ágústu Gísladóttur í viðtali við hina vinsælu útvarpskonu Valdísi Gunnarsdóttur. Jóna þessi reyndist vera frænka okkar og við klökknuðum yfir örlögum hennar en ég þekkti móður hennar ágætlega og man vel þetta hörmulega slys. Kl 13,00 fór ég á seinni hluta námskeiðsins í swingi og þá voru fleiri mættir í dansinn og það var bara æðislegt. Hópurinn fór svo saman á mitt uppáhaldskaffihús, Milano, eftir námskeiðið. Þaðan fór ég heim og horfði á US Master í golfi. Datt útaf áður en leik lauk. Já það er gaman að lifa.        

Athugasemdir

[Ágúst Ásgeirsson, 15.4.2008 kl. 19:45]

Aldeilis massíf færsla þetta - og fróðleg. Þú þyrftir fleiri stundir í sólarhringinn sýnist mér, algjört félagsmálatröll. Sem er bara hið besta mál.

Athyglisverð sagan af vinkonunni sem ætlar að fara að fara að prófa golf og byrjar á því að kaupa sér föt!!! Ég hélt maður yrði að byrja á því að læra að slá, það gerði ég allavega!

Alveg týpískar þessar konur (Neinei, þetta er bara sagt í gríni og ég er alveg laus við karlrembu - enda konur okkur fremri á vel flestum sviðum).

Bestu kveðjur

Gústi

[Kolbrún Stefánsdóttir, 15.4.2008 kl. 20:58]

Hi mér varð hugsað til þín í dag þegar þeir voru að fjalla um franska fótboltann í fréttum. Já þessi vika var frekar stíf og skemmtileg. Þykist vita að þú sért ekki illa haldinn að karlrembu. kveðja til þín Kolla.

[Ágúst Ásgeirsson, 15.4.2008 kl. 21:18]

Vonandi hafa þeir talað fallega um franska boltann, hann er býsna skemmtilegur yfirleitt - ótrúlegir talentar í mörgum liðum og Frakkar þurfa ekki að örvænta þótt toppmenn séu horfnir af sviðinu, eins og Zidane.

Svo ítreka ég bara að það er ekki hægt annað en dást af dugnaðinum að koma öllu því í framkvæmd sem um getur í færslu þinni.

[Guðrún María Óskarsdóttir., 17.4.2008 kl. 01:57]

Flottur pistill Kolla.

Já nútíma þjóðfélag útheimtir hin ýmsu hlutverk sitt á hvað , ekki vantar það, og það getur verið fróðlegt að taka saman eina viku.

góð kveðja. gmaria.

[Ólafur Ragnarsson, 17.4.2008 kl. 22:00]

Sæl Kolla.Þakka skemmtilegan pistil.Fróðleg að kynnast viku hjá athafnakonu.Ég hálfpartinn öfunda þig af"aktivitetet"Kært kvödd

[Gúndi Gangster (IP-tala skráð) 19.4.2008 kl. 11:55]

"Geturðu eytt heilum eftirmiðdegi í nákvæmlega ekki neitt hefurðu lært að lifa lífinu" Ég er vissulega sammála þér,lífið er dásamlegt og ég er mjög hamingjusamur að hafa fengið smá tíma með þinni nærveru af þessari ströngu viku þinni,dansnámskeiðið var mjög góð stund með þér,verst að hafa ekki komist á kaffihúsið með ykkur. Kv. Gúndi Gangster

[Kolbrún Stefánsdóttir, 19.4.2008 kl. 20:43]

Sæll Ólafur og Gúndi Gangster... Já ég var frekar aktiv í síðustu viku og eins þeirri sem nú er að klárast. Það er bara þannig að stundum er allt á sama tíma t.d. ræðunámskeið og sænskan og hæfileikakeppnin  Ég er bara svoddan tækifærissinni að ég tími ekki að sleppa svona tækifærum. Gott að Gúndi er sammála mér með dansnámskeiðið. Ég kann alveg að slaka á og eyða tíma í ekki neitt ef þannig verkast og t.d. eyði ég yfirleitt laugardagsmorgninum í tilfinningaríkar bíómyndir  á bíórásinni.

[Kolbrún Stefánsdóttir, 19.4.2008 kl. 20:52]

Æ ég gleymdi að þakka þér fyrir kommentið GMaría. Þakka þér líka fyrir samveruna á Rauðmagakvöldi FF í Grindavík í gærkvöld. Þú ert traust og góð við mig. kveðja til þín Kolla.