Eigum sjómönnum margt að þakka

Grein úr fréttabréfi Frjálslynda flokksins í Kópavogi.

Ágætu Kópavogsbúar.

Nú styttist í sjómannadaginn og vonandi verður hann ánægjulegur fyrir okkur öll. Sú var tíðin að þetta var minn uppáhaldsfrídagur og venjulega mikil stemming í kringum hann. Á Raufarhöfn, þar sem ég ólst upp, var sjómannadagurinn í hávegum hafður og skipaði stóran sess í mínu lífi. Það var eins víst og að jólin kæmu með öllum sínum hátíðleika, aukakóræfingum og jólastressi og að sjómannadagurinn kæmi með þeirri gleði og stolti sem fyllti hjörtu bæði sjómannanna sjálfra og aðstandenda þeirra. Þeir sem færðu björg í bú voru heiðraðir með því að taka þátt í þeirra hátíðarhöldum. Þá voru menn samhentir og lögðu sitt af mörkum til að gera daginn sem skemmtilegastan. Venja var að bjóða upp á siglingu um höfnina og mikið um leiki svo sem reiptog,  koddaslag, plankahlaup og margt fleira. Þegar ég bjó á Hellissandi var ég beðin um að halda hátíðarræðuna á sjómannadegi sem ég og gerði. Ég man að dóttir mín þá 13 ára gömul var slegin í sjóinn í koddaslag  og varð hálfsjokkeruð við það. Þetta gleymist ekki heldur lifir í minningunni sem hlýja og væntumþykja til þeirra sem voru nærri mér á þeim tíma. Það þarf nú varla að minnast á sjómannadagsböllin sem voru alltaf stórdansleikir sama hvort það var á Raufarhöfn eða Hellissandi. Það er  miður að þessi siður skuli hafa dalað undanfarin ár. Við skulum ekki gleyma upprunanum og þakklæti til þeirra sjómanna sem hafa í gegnum árin marga hildi háð við óblíðar aðstæður. Þeim eigum við margt að þakka á vegferð okkar til þeirra lífskjara sem við búum við í dag. Til hamingju með daginn sjómenn og megi ykkur farnast vel.

Athugasemdir

[Sigurður Þórðarson, 31.5.2008 kl. 12:54]

Minni fólk á að mæta fyrir utan stjórnarráðið á morgun kl 13:30 og taka með allt sitt skyldulið.

[Ágúst Ásgeirsson, 31.5.2008 kl. 21:20]

Vel mælt, Kolla.

[Ágúst Ásgeirsson, 31.5.2008 kl. 21:20]

já, og skemmtileg er myndin, alveg einstaklega.

[Kolbrún Stefánsdóttir, 1.6.2008 kl. 10:37]

Takk fyrir það Gústi. Já ég fann þessa mynd á vef FF, held að Magnús Þór hafi tekið hana en eins og þú sérð er þetta Raufarhafnarkirkja þar sem við fermdumst. Hann er með ótrúlega næmt auga og listrænt þegar kemur að myndatöku og á þar fræbærar myndir. Ég fann þar mynd af bátnum mínum, sem ég átti síðast,  Ægi Adolfssyni ÞH 99 og margar gullfallegar myndir. Kíktu á xf.is og gamla síðan. Bestu kveðjur Kolla.

[Kolbrún Stefánsdóttir, 1.6.2008 kl. 10:39]

hahah þetta átti auðvitað að vera frábærar ekki fræ...aukakveðja til þín Kolla.

[Ólafur Ragnarsson, 6.6.2008 kl. 21:33]

Sæl Kolla mín!Tek undir þessi orð þín.Þó seint sé í rassin gripið hvað varðar Sjómannadaginn.Því er nú ver hve fáir,allavega eftir skoðanakönnun Vísir.is.létu sér um daginn varða.Ávallt kært kvödd

[Kolbrún Stefánsdóttir, 12.6.2008 kl. 00:03]

Satt segirðu Hallgerður allt hefur sinn tíma og tímarnir breytast og mennirnir með en eitt veit ég að hefur ekki breyst í gegnum árin en það er að krakkar hafa alltaf gaman af að leika sér með fullorðnum og það er einmitt það sem gerðist alltaf á sjómannadaginn í minni plássum. Þá urðu allir börn. Mér finnst samt að við ættum halda í þann leik eins lengi og við getum og þá er upplagt að gera það á sjómannadaginn og heiðra sjómenn í leiðinni.