Frænkukvöld

Ekki var ég fyrr komin heim úr síðbúnu sumarfríi en ég hellti mér út í samkvæmislífið. Nú var það frænkukvöld og var óvenju langt síðan við hittumst síðast eða nánast tvö ár. Því miður voru fáar utan af landi enda kreppa að skella á en við vorum þó 15 samankomnar. Það var byrjað á Cafe Milanó en síðan var farið með hópinn í magadans og þar lærðum við tvo dansa. Við vorum nú misjafnlega þokkafullar með pallíettutuskur um lendarnar en allar reyndu sitt besta. Síðan var farið í mat þar sem boðið var upp á humarsúpu sem var frábær og grillaðar lambalundir með öllu tilheyrandi. Kiddi tengdasonur sá um þá hlið málsins. Eftirrétturinn var ís og kaffi. Þá var spjallað , spilað og sungið. Rúsínan í pylsuendanum var þegar Lauga, sem reyndist aldursforsetinn í þetta skiptið, tók gítarinn og jóðlaði af sinni alkunnu snilld. Við Arna Péturs vorum kosnar í næstu nefnd og verður nú erfitt að toppa frábæra frammistöðu þeirra Brimrúnar og Guðlaugar sem stýrðu þessu kvöldi.  Þær voru  frábærar þessar elskur. Kæru frænkur takk fyrir skemmtunina.

Athugasemdir

[Ágúst Ásgeirsson, 10.11.2008 kl. 21:52]

Fyrirgefðu forvitnina, en hver er þessi klára Lauga frænka? Er hún móðurmegin eða föðurmegin? Með kveðju, Gústi.

[Kolbrún Stefánsdóttir, 10.11.2008 kl. 22:58]

Sæl verið þið. Það er von að þú spyrjir Gústi því hún er hvorugt. Hún er ekkja Nenna ( Jóhannesar Guðmundssonar ) sem er sonur Siggu systir pabba en hefur alltaf verið tekinn sem bróðir pabba af því amma Fríða ól hann upp að mestu leyti. Lauga er búin að vera lengur í fjölskyldunni en flestar hinna en þó ekki lengur en ég því ég man eftir því þegar þau voru að draga sig saman hún og Nenni en þá var ég eitthvað um 10 ára gömul. Hún er alveg frábær í söng og gítarspili og ein af fáum sem kann að jóðla almennilega. kveðjur Kolla.

[Halla Rut , 11.11.2008 kl. 21:50]

Algjörlega nauðsynlegt að halda góðu sambandi við frænkur sínar.

[Kolbrún Stefánsdóttir, 11.11.2008 kl. 21:56]

Sæl Halla. Já það er mikið atriði að rækta frændgarðinn sinn vel og ég svo heppin að minn samanstendur af lífsglöðum og skemmtilegum konum.  Þakka þér fyrir innlitið og hafðu það sem best kveðja Kolla.