Trölli 2012

Nú styttist í 37. Öldungamótið í blaki. Öldungamótin eru hápunktur vetrarins fyrir blakara. Þar koma saman nánast öll lið á landinu. Mótið verður haldið á Siglufirði í ár og kallast Trölli.

Áætlað er að nú mæti 146 lið en voru 125 í Vestmannaeyjum í fyrra.  Kvennaliðin núna eru 100 og þar af 3 öðlingalið. Karlaliðin eru 46 og þar af 2 öðlingalið og 4 ljúflingalið. Blakíþróttin hefur verið að sækja mikið á undanfarið eins og sjá má af þessum tölum. Sérstaklega hjá kvenfólkinu. Það er víst orðið erfitt að komast í lið.

Mótið spannar ekki bara Siglufjörð heldur líka Ólafsfjörð og Dalvík  og verður haldið dagana 28.-30.apríl 2012. Spilað verður á 9 völlum: 3 völlum í íþróttamiðstöð hvers bæjarkjarna þar sem sundlaug og þreksalur er í sömu byggingu.

Það verður bara gaman að koma norður og hitta gamla og nýja félaga úr þessu sporti. Það verður líka gaman að keppa og horfa á aðra keppa.

Ég byrjaði aftur í blaki í haust eftir nokkurra ára hlé og spila með Víkingskonum. Við erum skráðar í 8. og 10. deild.  Við erum flestar komnar á þokkalegan aldur og er meðalaldurinn um 60 ár. Sumar hafa spila í áratugi en aðrar nýrri í íþróttinni. 

Ég reyni að halda metnaði í skefjum þar sem ég er í 10 deild og því ekki raunhæft að vera með einhverjar rosa væntingar í sambandi við sigra og árangur, annan en þann að verða sér ekki til skammar og passa sína stöðu.
Ég spila ýmist "kant" eða " miðju" og finnst báðar stöður skemmtilegar en nýt mín betur í miðjustöðunni. Dætur mínar eru báðar í blaki og spila nú með Fylki en voru áður í Raufarhafnarliðinu sem myndin hér að ofan er af. Ég hef  fylgst með Fylkisliðinu af miklum áhuga í vetur. Þær spila báðar miðjustöðu og ég reyni að læra af þeim.

Áfram Víkingur  Áfram Fylkir

 

Athugasemdir

[Helga Kristjánsdóttir, 5.4.2012 kl. 01:53]

Sæl Kolbrún mín,gangi ykkur vel.Segi eins og á íþrótta máli; Góð íþrótt gulli betri.

[Kolbrún Stefánsdóttir, 5.4.2012 kl. 09:03]

Takk fyrir það Helga. Sammála því að íþróttir eru góður vettvangur og þar geta flestir fengið afþreyingu við hæfi. Ég hitti son þinn ,golffélagann, og fjölskyldu hans á flugvellinum í KEF síðast þegar ég fór þar um. Líklega hefur keppnisskapið hans gert kraftaverk á honum. Ég dáist að honum og bið þig fyrir góðar kveðjur til hans.

[Magnús Geir (IP-tala skráð) 12.4.2012 kl. 17:51]

Þið mæðgur hljótið þá að vera lítt lágvaxnar, lagði K?

[Kolbrún Stefánsdóttir, 13.4.2012 kl. 15:14]

Ja þú sérð okkur þarna í færslunni Magnús og við erum frekar hærri en lægri. Á æfingunni í gær sagði þjálfarinn við þær í hinu liðinu " Ekki gefa upp svona nærri netinu því svona hávaxin miðja étur alla bolta" það var semsagt ég að trufla spilið hinu megin  Ég var nú ýkt ánægð með þessa yfirlýsingu :) kveðja Kolla

[Ágúst Ásgeirsson, 13.4.2012 kl. 19:47]

Gaman að þessu, en það kom mér á óvart hversu stórt Raufarhafnarliðið á efri myndinni er. Hélt það væru ekki svo margar konur á þessum aldri eftir þar! Bestu óskir um gott gengi.

[Kolbrún Stefánsdóttir, 16.4.2012 kl. 08:17]

Sæll Gústi. Það eru með þeim stúlkur sem eru giftar eða tengdar við Raufarhöfn með einum eða öðrum hætti eða í  besta falli bara vinkonur. Þær eru ekki allar aldar upp heima á Raufarhöfn. Allt flottar og hressar stelpur " samt sem áður "  kveðja Kolla

[Ágúst Ásgeirsson, 17.4.2012 kl. 11:05]

Takk fyrir útskýringarnar. Sammála því að þetta séu topplið, og það á  báðum myndunum.