Skýjum prýddur Skagafjörður

                                         

 

 

 

 

 

 

Ég átti erindi á Sauðárkrók og ekki var um annan dag að ræða en fyrsta dag desembermánaðar. Ég varð að keyra þar sem ekki er flogið þangað alla daga. Ekki finnst mér nú leiðinlegt að keyra um þjóðvegi landsins og hef gert mikið af því síðustu 20 árin. Mér fannst samt frekar verra að nú spáði hálku á heiðum og snjó fyrir norðan. Ég er ein af þeim sem hef tröllatrú á nagladekkjum en nota þau ekki. Það var því með smá óhug sem ég hélt af stað í birtingu.

Brátt léttist lundin og söng ég hressilega með norskri danshljómsveit á leiðinni norður. Ég setti mér það að vera á löglegum hraða eða því sem næst og setti "krúsinn" á. Stoppaði á Blönduósi í pylsu og kók.

Nú var komið að því að fara leið sem ég hafði ekki keyrt áður en þetta var í annað skipti sem ég heimsæki Sauðárkrók. Hitt skiptið var fyrir 25 árum þegar ég fór með eldri dótturina í framhaldskóla þar, en við bjuggum þá á Raufarhöfn. Nú keyrði ég að sunnan og því fór ég niður í átt að Skagaströnd og yfir Þverárfjall og þannig á Krókinn. 

Ég var alveg heilluð af fegurð náttúrunnar þó hún væri hulin snjó. Hvítt og frítt skartaði landið mikilli fegurð. Þá var skýjafar afar sérstakt og heillandi og það svo mjög að ég var alltaf að stoppa til að taka myndir á nýju vélina mína. Ég hélt á tímabili að ég væri að upplifa heimsókn geimvera því ský voru eins og fljúgandi furðuhlutir. Glitskýin voru einstök og mikið um græna og fjólubláa liti. Þetta hafði ég ekki séð áður hvorki hér heima né annars staðar.

Á Sauðárkróki var ísing á götum og mér þótti menn keyra fullhratt um strætin. Það var mikið skreytt og jólaljós í flestum gluggum. Alger jólabær. Að loknu erindi keyrði ég svo til baka en var hálf draugahrædd á fjallinu. Heim komst ég án þess að verða vör við löggu hvað þá meira.  

Athugasemdir

[Erla Magna Alexandersdóttir, 8.12.2010 kl. 21:11]

Kolla það þarf meira en snjóföl til að hrella fyrverandi Raufarhafnarbúa kv. Erla M

[Kolbrún Stefánsdóttir, 8.12.2010 kl. 22:24]

hahaha já satt segirðu Erla mín. Ég er bara að verða eins og kirkjurotta eða 101 íbúi hahah hrædd við drauga, vantreysta bílnum os.frv. hahaha  Ég er allavega nógu mikill Raufarhafnarbúi til að vera  á gráu svæði og óttast því vegalögguna.:) kveðja til þín listakona .  Kolla.

[Atli Ágústsson (IP-tala skráð) 12.12.2010 kl. 19:11]

Ég er líka alveg heillaður af norðlenskri fegurð Kolbrún. Sérstaklega frá Raufarhöfn  Svo eru frábærir pistlarnir þínir skemmtilegir, fróðlegir og fallegir