Sumarnótt

Í gærkvöld hitti ég fólk sem ég hef unnið með í Evrópuverkefni á vegum Menntastefnu Evrópusambandsins  en þau eru hér í heimsókn. Þau voru mest undrandi á birtunni. Að það skyldi vera bjart og klukkan orðin ellefu um kvöld. Þvílíkt og annað eins sagði konan og hló. Við áttum skemmtilega stund á Café Milano og töluðum um síðasta fund okkar sem var í nágrenni Mílan á Ítalíu. Þó þessi verkefni séu mest ferðalög og skriffinnska þá er alltaf eitthvað sem hvert verkefni skilur eftir sig. Aukinn skilningur á ólíkri menningu og mismunandi hefðir í hverju landi. Þau voru búin að heimsækja Stokkseyri og fá sér humar þar en ekki var búið að opna Draugahúsið þannig að þau misstu af þeirri skemmtan sem enginn ætti að gera. Við munum síðan hittast aftur í Vín um miðjan mánuðinn og fara saman til Brno í Tékklandi. Það verður örugglega gaman að koma þangað þó ekki sé þar björt sumarnóttin.

Athugasemdir

[Ágúst Ásgeirsson, 2.6.2010 kl. 20:22]

Erfitt að átta sig á myndinni, líklega er hún af einhverjum golfvelli!? En hún hæfir viðfangsefninu. Þessu trúi ég vel sem þú segir um útlendingana, þeir eiga yfirleitt öðru að venjast.

Ánægjulegt að sjá þig blogga á ný. 

[Kolbrún Stefánsdóttir, 5.6.2010 kl. 00:54]

Sæll Gústi. Jú rétt er það. Þetta er tekið yfir golfvöllinn Keili í Hafnarfirði á litlu vélina mína og gæðin ekki fyrsta flokks en það var ægifagurt um að litast. Já nú fer ég að taka til við bloggið aftur. kveðja Kolla.