Ljótu hálfvitarnir og góðverkin

Í fyrrakvöld fór ég í Halaleikhúsið á frumsýningu á leikritinu Góðverkin kalla eftir Ármann Guðmundsson, Sævar Sigurgeirsson og Þorgeir Tryggvason. Þetta er gamanleikrit um lífið á Gjaldeyri við Ystunöf í leikstjórn Odds Bjarna Þorkelssonar og Margrétar Sverrisdóttur sem bæði eru margreynd, bæði sem leikarar og leikstjórnendur.

Mér fannst rennslið í uppfærslunni frábært og hiklaust enda fannst mér ég nýkomin þegar leiksýningu var lokið en samt búin að skemmta mér í langan tíma. Leikmyndin flott og passandi efninu. Þetta efni hentar sérstaklega vel fyrir þá sem búið hafa í sjávarþorpum og á minni stöðum úti á landi en annars bara öllum sem hafa minnsta vott af kímnigáfu.

Ég er farin að halda mikið upp á suma leikara Halaleikhópsins. Í þessu verki fannst mér Árni Salómonsson fara á kostum enda hlutverkið vítt og bauð upp á góða möguleika fyrir hæfileikaríkan leikara. Ég verð þó að hæla líka Sóley Björk sem lék drykkfelda þorpskerlingu ótrúlega sannfærandi og Daníel Þórhallssyni sem lék frekar sauðskan lögfræðing en auk leiktúlkunar hefur hann afar góða framsögn. Gunnar Gunnarsson sem lék Jónas (allra Jónasa) er bara alltaf góður sama hvaða hlutverk hann fær. Þetta var frábær skemmtun. Allir léku af innlifun og gáfu mikið af sér enda leikstjórnin greinilega góð. Hlátrasköll annarra gesta voru til marks um að ég var ekki ein um að skemmta mér.

Í fyrra sýndi Halaleikhópurinn stórleik í dramatísku verki, Sjöundá( Ágústa Skúladóttir lstj), eftir Svartfugli Gunnars Gunnarssonar og fór á kostum. Þar áður var það Gaukshreiðrið ( Guðjón Sigvaldason lstj ) en sú sýning var kosin athyglisverðasta áhugaleiksýningin 2007-8 og þá fengu þau Kærleikskúluna sem eru hvatningarverðlaun frá Styrktarfélagi lamaðra og fatlaðra.

Sjáið endilega þessa sýningu. Hún er ótrúlega fyndin. Það mun enginn sjá eftir því enda efnið og andinn lýsandi dæmi um "kostuleg vinnubrögð Ljótu hálfvitanna". 

Athugasemdir

[Ólafur Ragnarsson, 6.2.2011 kl. 21:33]

Sæl mín uppáhaldsvinkona. Ekki kem ég nú til með að sjá umrætt stykki. Því ég hugsa með hryllingi ef ég skyldi þurfa upp á land.Og eina sem mér dettur í hug núna er svartur ruslapoki á leið ti Keflavíkur sem var minn fæðingarstaður Og ég bið nú bara til guðs almáttugs að þú sért ekki að tala um þá Margréti sem ég hef í huga. Annars getur sú sem ég meina nú brugðið sér í ýmiss gerfi og viðhaft hin ýmsu sjónarspil grunar mig. En hvað um það. Það fer að koma "time" á nokkur viðtalsspil í náinni framtíð. Það er víða en á Gjaldeyri sem mál eru komin á ystu nöf. Sértu ávallt kært kvödd

[Kolbrún Stefánsdóttir, 6.2.2011 kl. 21:47]

Sæll Óli minn. Nei þetta er allt önnur Margrét, einhver sem ég hef aldrei séð áður en hin er jú líka kostuleg eins og sagt var í gamla daga. Já við þurfum að fara að taka menningarspjallið okkar. Vona að þú sért hress og kátur og skil vel þó þig fýsi ekki í ferðalög eins og tíðin er og það við Vestmannaeyjar æææ Úff ... bestu kveðjur Kolla.

[Magnús Geir Guðmundsson, 18.2.2011 kl. 10:49]

Mega N-þingeyingar tala svona fallega um S-þingeyinga og þeirra verk?

Bestu kveðjur til þín í Eyjum herra Ólafur.

hvað er í fréttum frú Golf, gifting og barneignir frekari kannski í vændum?

[Kolbrún Stefánsdóttir, 22.2.2011 kl. 11:00]

Sæll félagi Magnús. Nú er búið að steypa allri Þingeyjasýslunni saman í eitt alsherjar batterí og nú verða Húsvíkingar ofl. að þola vísurnar sem Egill hvað forðum og við ræddum um í okkar fyrstu samskiptum  nú hljóta þær að gilda fyrir allt svæðið hahahaha.

Allt gott af mér að frétta eftir "brottreksturinn " úr vinnunni sem þótti fréttamatur á Vísi.is. Greinilega gúrkutíð þar.

Ég hef ekki spáð í barneignir enda bý ég við mikið barnalán en hef verið að hugsa um hundaeign þ,e, ef ég er hætt að vinna for good!

Frú Golf er uppnefni sem ég gæti vanist... fór í viku til Tenerife í golf núna 8-15 febrúar og var á 35 punktum , fékk bara 11 í vallarforgjöf og svo á að nota sumarið til að lækka sig almennilega  Bestu kveðjur Kolla